18 ga Maris: Hukumar NSCDC ta tabbatar da gudanar da zabe cikin kwanciyar hankali a Zamfara

Atsakkiya kwamandan NSCDC Muhammad Bello Muazu

Daga Aliyu Buhari Gusau 

Kwamandan jami’an tsaron farin kaya  na jihar Zamfara, Muhammad Bello Muazu ya tabbatar da kudirinsa da shirye-shiryen rundunar na ganin an gudanar da zabukan gwamna da na ‘yan majalisar jiha cikin sauki. 

Hakan na kunshe ne a cikin wata sanarwa da kakakin rundunar, Ikor Oche SC ya sanya wa hannu. aka fitar ga jaridar  gaskiya, (The truth newspaper)

A cewar kakakin rundunar,  Kwamandan Muhammad Bello Muazu ya bayyana hakanne  awani taron masu ruwa da tsaki da hukumar zabe mai zaman kanta ta kasa INEC ta shirya  a jihar Zamfara, karkashin jagorancin kwamishinan INEC na kasa mai kula da jihohin Sokoto, Kebbi da Zamfara, Farfesa Muhammad Sani Kalla ( OON) wanda aka gudanar a hedikwatar INEC ta jihar.

"NSCDC  ta yi amfani da dabarun tura mutanenta bisa ga yawan jama'a da kuma raunin wuraren yin rajistar ga rashin tsaro saboda manufar zaben Gwamna da yan majalisar dokokin jihar da za a gudanar a ranar 18 ga Maris," in ji MB Muazu. 

MB Muazu ya ci gaba da cewa, hada karfi da karfe da sauran hukumomin ‘yan uwa, za’a gudanar da zabe mafi inganci ta fuskar tsaro.

 “NSCDC ta samar da layukan waya kusan guda goma a fadin kananan hukumomin majalisar dattawa wadanda za a iya samun saukin kamuwa da duk wata barazana”

MB Muazu ya yi kira ga masu ruwa da tsaki da su baiwa jami’an tsaro hadin kai tare da horo mabiyansu da su kasance masu bin doka da oda a lokutan zabe da kuma bayan zabe. 

“A halin da ake ciki, wanda ya kira taron, kwamishinan INEC na kasa mai kula da jihohin Sokoto Kebbi da Zamfara, Farfesa Mohammed Sani Kalla OON, ya bukaci masu ruwa da tsaki su kasance masu bin doka da oda da kuma tabbatar da gudanar da zabe cikin ‘yanci. 

“Ya yabawa jihar Zamfara bisa yadda aka gudanar da zaben da ya gabata cikin kwanciyar hankali. Sai dai ya nuna kwarin guiwa da  tsarin tsaro na jihar don tabbatar da sake gudanar da zabuka cikin kwanciyar hankali.”